Hótel Djúpavík

Hótel Djúpavík er staðsett í stórbrotnu landslagi við botn Reykjarfjarðar á Ströndum. Djúpavík er u.þ.b. 75 km norðan við Hólmavík (sjá leiðarlýsingu hér).

Á efri hæð hótelsins eru 8 hlýleg tveggja manna herbergi með handlaugum. Á gangi eru snyrtingar með karla- og kvennasalernum og steypiböðum.

Við bjóðum upp á morgunverðarhlaðborð og kvöldmat í matsal sem er mjög sérstakur og fallegur. Kaffi, te, brauð og kökur eru á boðstólum yfir daginn, ásamt léttum veitingum í hádeginu.
Fyrir utan herbergin á hótelinu bjóðum við einnig upp á svefnpokagistingu í tveimur minni húsum, þar er pláss fyrir 8 til 10 manns í hvoru húsi.

Hótel Djúpavík er opið allt árið um kring.

Við leggjum mikinn metnað í að halda sérstæðu andrúmslofti húsanna okkar og gestir okkar kunna vel að meta þá alúð sem lögð hefur verið í að viðhalda þeirri sérstöðu.

Húsið sem nú er Hótel Djúpavík var byggt á 3ja áratug síðustu aldar fyrir konur sem unnu á söltunarplaninu við söltun síldar. Þá kallaðist það Kvennabragginn. Það var síðan gert upp árið 1985 og það sumar komu síðan fyrstu gestirnir á hótelið.

Ýmis konar afþreying er í boði í nágrenni hótelsins. Þú getur farið í skemmtilega leiðsöguferð í gegnum gömlu síldarverksmiðjuna og skoðað þar Sögusýningu Djúpavíkur. Farið í frábæra útsýnisferð (Djúpavíkurhringinn) upp á hamrana fyrir ofan þorpið eða heimsótt sérstæðustu sundlaug á Íslandi sem hituð er upp með sjálfrennandi vatni frá heitum hverum. Afþreyingar síðan okkar gefur nánari upplýsingar.

Umhverfismál eru forgangsmál hjá Evu og Ásbirni eigendum hótelsins. Þú getur sest niður með þeim yfir kaffisopa og rætt við þau um umhverfismál, málefni landsbyggðarinnar og landsins gang og nauðsynjar.

Myndasafnið okkar inniheldur mikið af ljósmyndum af hótelinu og umhverfi þess.

Smellið hér til að sjá nýjasta verðlistann okkar.